Hulle groei hoog in die mikke van woudbome en dra die mees eksotiese blomme waarvoor die adellikes vroeër bereid was om ’n plaas se prys te betaal. Deesdae is orgideë egter allemansblomme.
Dit is nie om dowe neute dat eksotiese orgideë by die dosyne op kwekery- en selfs kettingwinkelrakke pronk nie. Dié met hul delikate, satynagtige blomme het gesogte dekorplante geword en is boonop nie meer onbekostigbaar nie.